كل واحد يدخل ويقولنا موقف محرج... [الأرشيف]

مشعل بن ماجد

10-31-2008, 10:01 PM

بسم الله الرحمن الرحيم

اولا اتمنى من ادراة المنتدى تثبيت هذا الموضوع....

جتني فكره ان كل واحد يدخل ويقولنا موقف محرج صارله او مواقف ان كان امكن...

ابدأ بنفسي...

في يوم من الايام وانا راجع البيت تعبان قرفان من العمل تقريبا الساعه 8 بالليل وادخل في البيت واحصل خالتي جايه عندنا وهي اللي ترحب فيني ذاك الترحيب انا حسيت ان الدعوه فيها انا اثاريها تبيني اوديها لمستوصف اهلي حول البيت علشان تقيس ضغطها وانا قلتلها اوكيه يالله انا استناك برااا.

وانا يا جماعة الخير فيني طبع مش كويس الا وهو البحلقه في الناس" يعني اناظر فيهم وانا ما ادري عن نفسي" طبعا ذي اطنازتي على واحد من الشباب في الجامعه, طبعا ذي المشكله مسويتلي مصايب تلقاني احيانا افهي في وجيه خلق الله وانا ما ادري على سبيل المثال طبعا هاذي برا سالفتنا" ذيك اليوم وانا في احد الاسواق واقف انا عند باب محل اتفرج على الرايح والجاي ولا في اثنين يسلمون على بعض ويمزوحون مع بعض وانا جالس اتفرج عليهم جالس ابتسم على مزحهم ولا حاس عن عمري الا وخوي طالع من المحل شافني كذا ويقوم يسحبني مع رقبتي"...ههههههه

المهم نرجع لسالفتنا تبع خالتي وتجي خالتي وتركب معي وانا اللي اشغل الموتر وادز فيها للمستوصف واقولها اجلسي في ويتنق ايريا واروح للرسبشن ولا فيه كم رجال وقلت الموظف المصري عندي مريضه بتقيس الضغط قالي اصبر شوي لانه جالس يكلم واحد في هاذي الاثناء اشتغلت عندي البحلقه في الناس وانا في قمت بحلقتي العزيزه الا التفت علي المصري قالي وش اسم المريضه انا اتلخبطت لاني كنت خاش مع واحد وولده مريض ونسيت اسم خالتي والله يا جماعة الخير نسيت اسم خالتي... وهو يرد يسألني اسم المريضه ايه؟ والرجال اللي واقفين كلهم يناظروني انا في ذا الوقت جا في بالي الف تفكير منها قلت بس ذولي يحسبون اني ما ابي اقول اسم خالتي قدامهم...والمشكله وش اسوي اروح اقول لخالتي يا خاله وش اسمك؟؟؟ اخر شي المصري قالي انت اسمك ايه"تعرفون المستوصفات الاهليه عادي تدخل بملف اخوك او امك" عاد اشوا ما نسيت اسمي علمته قلتله مشعل....

عاد اللي قهرني اول ما عطاني الورقه تبع فحص الضغط تذكرت اسم خالتي هههههههههه

اتمنى من الجميع المشاركه حتى لو اكثر من سالفه....

D A Y T O N

10-31-2008, 10:44 PM

هههههههههههههههههههههههههههههههه حسبي الله ع عدوك

بس حلو إن المصري عطاك مخرج وبسك مطالع في الناس

يثبت الموضوع مشروط بالتفاعل !!

مشعل بن ماجد

11-01-2008, 06:29 AM

دايتون اولا مشكور لمرورك

ثانيا وين مشاركتك ولا المدرا مالهم مواقف محرجه...ههههه

ثالثا انا كلي تفائل بتفاعل الاخوان مع الموضوع

بنت ابوها

11-01-2008, 11:24 AM

هههههههههههههههههههههههه

والله من اللقافه....

مبروك الاشراف شعلولي...

اما الموقف راح اقولكم بعدين لاني بزي الحين...

مشعل بن ماجد

11-01-2008, 12:31 PM

من طول الغيبات جاب الغنايم يا بنت ابوها

والله من اللقافه....<<<الله يسلمك

مبروك الاشراف شعلولي...الله يبارك فيك بس كل يوم طالع لي اسم مره شعلولي ومره شعيل نشوف بالايام الجايه وش يطلعلي اسم ههههههه

اما الموقف راح اقولكم بعدين لاني بزي الحين...ايه صح حان موعد طبخ الغدا هههههههه

تشرفنا بمرورك

د.مزاجي

11-02-2008, 02:22 PM

والله انها مشكله هالبحلقه
بس انسى اسم خالتي كذا وصلت اخطر حالاتها

اما بالنسبه لمواقفي

فهي مره كنت عن اخوالي وكان عندهم عزيمه كبيره
المهم ويستلمنا خالي صبو قهوه ومادري شنو المهم والله ماقصرو عيال خالي قهوو الرجاجيل مع انه ماطاعو يخلصون
واتليقف وامسك الدله والمشكله المجلس كبير فيه واحد الله يستر علينا وعليه
متحمس مع السالفه ورفع يده انا بذهانتي توقت انه يشر لي يبيني اصبله
واجيك طاااير بالدله وهو متحمس بالسالفه واشوف بالطاوله الي بجنبه فنجان واخذه
واصب واقول تفضل يوم كبس بعيون وناظرني
وقال انا ماطلبت قهوه المشكله هالرجال معروف انه يعطيك اياها بالوجه يعني ماعنده مشكله
المهم يوم ناظر بالطاوله قال اصلاً هذا موب فنجالي وانا من جيت اتقهوا ولو اني ابي ناديتك
طبعاً انا وجهي تقلب الف لون ولون
والله ستر ماكمخته بالدله عشان يعرف يتكلم معي
المهم وانا ارجع لعيال خالي اجر الخيبه وهم يفطسون ضحك ويقولن مالقيت تصب لغيره هذا شر
والسانه يلوط اذانه
المهم بعد هالموقف مافيه امل اصب قهوه في ذاك المجلس

غ ـنـٍوٌجَـٍـۃْ

11-02-2008, 06:47 PM

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخـــــــ ياويلي واللهــ انا لو منكــ وشيــ راح يقلبــ الالوانــ على العموم انا ام المواقفــ المحرجهــ خخخخخخخ يعني شنو اقول شنو اخلي من المواقف بس كلها محرجهــ يسلمووووووووووووووووووووو ياشعيل

مشعل بن ماجد

11-02-2008, 10:03 PM

البرنس هههههههههههههههههههههههههههههه

بذهانتي<<<الله يرحم ام الذكاء هههههههههههههههه

اخخخخخخخ لو انا مكانك كان حطيت الدله على الطاوله وامسكه مع رقبته واقوله تعال ابيك بشي واوصله عند باب الشارع وارفسه رفسة نا صر القصبي اذا قام يستهبل واسكر الباب واعدل ثوبي عقب الحوسه وارجع اقهوي الرجال...ههههههههههه

على العموم شكرا لمشاركتك وصراحتك...والمره الجايه خلك عضو شرف في العزيمه

مشعل بن ماجد

11-02-2008, 10:05 PM

بنوووووووووته هلابك يا بووووي

بما انك ام المواقف المحرجه....طيب موقف واحد على طاير قوليلنا...

على العموم ننتظر مشاركتك واوعدك ما اضحك عليك

سراب

11-03-2008, 12:32 PM

والله يامشعل المواقف المحرجة عد وخل من كثرها

لاكن ابي اقولكم موقف واحد مر علي بقد ماهو محرج قد ماهويقهر

كنت في السوق ولما انتهيت جلست استنى السياره ولفت نظري مجموعة بنات دخلوا للسوق لبسهم الله يكافينا الشر ثنتين منهم راحوا لدورات المياه

ووحده منهم وقفت قريب من عندي وكانت لبسها مبين جميع تفاصيلها لو قلتوا لي وصفيها وصفتها وانا بنت فتني شكلها وش لون الشباب والكل واقف

اللي يناظر واللي يكلمها واللي يحاول يمسك يدها كان الموقف كله يقهر

وبما اني ملقوفه شوي رحت لها وقعدت انصحها واقولها اللبس هذا ما يصلح للسوق ومن ذا الكلام وجت وحده من الحريم وانصحتها معي وحسيت ان البنت

استحت شوي وبعد فتره جوا اللي كانو معها وقالتلي وحده منهم انتي وش تبين ببنتي صراحة انصدمت لان الام لبسها ما يباعد لبس البنت

قلتلها حرام عليك تاركه البنت عرضه للي مايسوى كان خليتيها على الاقل تلبس عبايه غير هذي

خزتني بنظرة يحبها قلبكم وقالتلي

صدق انكم بدو ومتخلفين وما تتركون لقافتكم الناس تطوروا وانتم افكاركم رجعيه

وقامت تصارخ علي حتى البنت اللي معها استحت وقامت تعتذر وكل السوق تجمع علينا

حسستني اني غلطانه وراحت وانا واقفه مكاني مو عارفه وش اقول

بصراحه اول مرة في حياتي ما اعرف ارد على موقف اتعرض له

وخلالالالاص طلعت من السوق وحلفت اني ما انصح اي وحده لابسه كذا

مشعل بن ماجد

11-03-2008, 03:55 PM

ههههههههههههههههه احسن من قالك تتلقفين!!!!!!!!

بس والله اني رحمتك يا حرام...

طيب ما تدلين بيتهم علشان انصحم...هههههههههههههههههههه

علشان تعرفين قيمتنا احنا اللي نتحمل لقافتك...ههههههههههه

على العموم الف شكر مشرفتنا النصوحه على تفاعلك ........ وراح انتظر منك مواقف محرجه ثانيه...

سراب

11-03-2008, 04:11 PM

اما عاد مواقف ثانيه

والله ان تموت من الضحك على

الباقي انا اخترت اهون المواقف

واحرجتني والله يوم ضحكت علي

لاكن استاهل من اللي قالي اكتب الموقف

خخخخخخخخ

مشعل بن ماجد

11-03-2008, 04:14 PM

هههههههههههههههههه

لا وش دعوه سراب اوعدك اني ما اضحك بس انتي اكتبي...

د.مزاجي

11-03-2008, 05:39 PM

هههههههههههههه
سراب اعتقد انهالحرمه ماجربت الكعب على الجبهه صدقيني
له مفعول
يدوم ويدوم ويدوم

وبعدين النخله العوجا ماتتصلح
والقطو العود مايتربا

مشعل بن ماجد

11-03-2008, 07:23 PM

عاد انت ابخص بالكعب يا البرنس...هههههههههههههه

د.مزاجي

11-03-2008, 07:39 PM

هههههههههههههه
كنك داري الله لايوريك

سراب

11-03-2008, 07:46 PM

والله ياالبرنس

شكلك ما صدقت فيني خبر

كانك مستني الفرصه

عموما صدقت بكلامك الاخير

بالاول كنت ناويه اكتب موقف ثاني

لاكن الحين هونت

مشعل بن ماجد

11-03-2008, 07:49 PM

اوف سراب تعالي ...يا لقفك لقفاه يا البرنس زين فوت علينا سواليف سراب....هههههههههههههههه

د.مزاجي

11-03-2008, 08:36 PM

خلاص بسكتت بس قولي موقفك الثاني<<<اللقافه بدت تشتعل عنده

الـــبارونه

11-06-2008, 04:19 PM

هههههههههههههههههههههههههههههههههههههههههههههههههه هههه واو ياشين الطنزه اتمن ان يكون هذا درس لك عشان ماتتطنز بهم الله يعين علي مابلاك الله يعينك اذا تزوجت وطاحت عينك علي حريم متجمعين بسوق ومعك زوجتك تبي نصيحتي لا تعرس ودخل نفسك بمشاكل وكانك معرس الله يعينك

الخيال

11-07-2008, 12:32 PM

اخوي مشعل

وش اخبارك ابقولكم اليوم موقف صار لي هو محرج شوي لاكن ما تضحك علي

والموقف هو

ومن سوء حظي دخلت حمام قسم الرجال وقاعد اتروش ما عندي من الشيطان شئ ومروق ويوم

جيت اطلع انكسر المفتاح في الباب وتعال شوفني 0

وجلست في الحمام من الساعه خمس العصر الى الساعه الواحده في الليل ومن سؤ حظي معلق منشفتي برى الحمام

وبعد الساعه وحده جاني ولد اختي وسمع صياحي وكسر الباب وفك الحصار 0

والمصيبه ان الشباب كانو طالبين مني اغراض وطبعا ماجبتها لهم وزعلوا علي والناس تعشوا واستانسوا وانا محبوس

في الحمام .

وبعدها حلفت مااقفل باب الحمام ابد

وسلامتكم

مشعل بن ماجد

11-07-2008, 09:58 PM

جعلك سالم

ههههههههههههههههههه بس تدري اقفل الباب وخل معك شنطة العده احتياط علشان تكسر الباب او اي شي...

مرورك سرني

مشعل بن ماجد

11-07-2008, 10:06 PM

احلاكم واتحداكم...

مشكور لمرورك واتمنى انك تحط موقف لك نضحك عليك شوي ....ههههه

آدّمنتْ ح’ـبڪَ

11-08-2008, 12:46 AM

السلام عليكم ورحمة الله وبركاته

اليوم رح اقول لكم موقف واحد واخف موقف حصل لي<<< متعودهـ على الكوارث ككككك
المهم كنت انا والاهل بزواج المهم جلسنا لين الساعه 1/2 1...تقريبا
دق الوالد علينا قال اطلعوو ..

وقمت اللبس عباتي ..وكانت امي وخواتي بالسياره ...
ودق جوالي (( بنت عمتي ))
وقعدت اكلمها وانا اللبس العبايه
المهم
يوم طلعت وقفت عند باب القصر
الشارع مليااااااااااااااااااااااااااااااااااااان شنبات من 15 الي 50 سنه
وكلهم ينتظروون اهاليهم متى يطلعووون
وانا واقفه ومطيره عيوني ..ويناظروني وكأنهم يقولوه (( وش تبي ذي ))

واللي تكلمني بالجوال ماسكه خط بالسواليف وانا مو لمها
ومن كثرهم ما انتبهت للدرج

وانا كنت لابسه كعب ... ...
ومادريت الا ......
طرااااااااااااااااااااااااااااااااااااخ عـ وجهي
رجليني بأول الدرج وجهي بأخر الدرج وجوالي بجهه وشنطتي بجهه
واللي صد كأنه ماشاف واللي قاعده يضحك ..واللي تلطم علشان يبضحك زيييين
قمت بحركه سريييييعه مسكت الشنطه واخذت الجوال قلت للي بالجوال (( ايووا كملي )) << ردة فعل
يوم شافوني سويت كذا انفجرررررروا ضحك ...من جد حركه غبيييه

ورحت لسياره وانا مو مستوعبه اللي صااااار وفتحت باب السياره كانت شغالتنا جالسه من نفس الجهه اللي عندي
وبدوون شعووور جلست عليها هي استغربت وش اللي جاني ..
بعدين يوم استوعبت وخرت عن الشغاله وجلست زين
ويناظرون فيني اهلي واقعد اصيح لين وصلت البيت
ويوم وصلت البيت واقعد اضحك من جد والصراحه اذا كنت طالعه وشفت رجال لازم اطيح عاد شوفوا كل طيحه شكل هههههه

سراب

11-08-2008, 11:15 AM

قاهرة الاسطوره والله موقف

لاكن انتي ارحم مني دايم الزواجات يصير فيها مواقف وخروا عنها

شجعتيني اقول هذا الموقف اللي صار لي مع ثنتين من العضوات الموجودات معنا بالمنتدى لاكن اذا شرشحوني يا مشعل ابي احطها براسك

زين.

كنت في زواج معي بنتين حلوات( عشان ما يزعلن) وطبعا جلسنا في الزواج لين الساعه 12 ليلا وزهقنا وحبينا نروح للبيت وكلمت وحده

من البنات اخوها يجي ياخذنا وبعد طلبه وحب خشم قال اجيكم وادق دقه واسكر واذا ما طلعتوا بعد عشر دقايق اروح واترككم

قلنا ما شي خلنا نروح نلبس عباياتنا ونوقف عند الباب عشان بسرعه نطلع وعلى طلعتنا قعدنا نسولف مع وحده ويالله سالفه ورى سالفه

والاخ يدق دقه واخته نست ان جوالها على الصامت وفجأة شافت الجوال لقت فيه اربع مكالمات لم يرد عليهاوطلعنا نركض للشارع عشان

ما يروح ويتركنا يسويها.

وسالت اخته وش سيارته قالت فورد ابيض قلت شوفيه والله انه طيب موقف سيارته على الباب ومسترخي فيهاونزلنا وركبنا السياره ونعلق

على الزواج ونقول وع بايخ صدع روسنا ومن ها الحكي

لاحظنا ان الرجال ما تحرك ولاشي كنه نايم هاوشته اخته وقالت نايم قوم راجنا وبالاخير تنام صدق انك دلخ قام الولد وطالع فينا وهو

مستغرب وش يبون ذولي.

طلع واحد ما نعرفه وراكبات معه غلط صراحه طاحت وجيهنا ومن البجاحه فينا هاوشناه وش موقفك كذا ونايم ( والله ما نستحي)

والمسكين مو عارف وش يقول ونزلنا من السيارة ببرود الا والاخ الثاني واقف بسيارته ورى ومعصب الى اعلى درجه لو بكيفه

نزل وخنقنا وركبنا معه وعطانا كم تهزيئه يحبها قلبك وغسل شراعنا والى الان ما ودانا مشوار ولاركبنا معه من عقب الزواج

وسلامتكم

غ ـنـٍوٌجَـٍـۃْ

11-08-2008, 01:59 PM

خخخخخخخخخخخخخخخخخخخخخخخخخخخخخخــ سرابـــ خخخخخخخخخخخخخخخخخخخخخخخ لا تفضحينا خخخخخخخخخ على اقلــ هذا الموقفـــ يهونــ معــ المواقفــ الثانيهــ اليــ تصيرلنا يسلمووووووووووووووووووو

مشعل بن ماجد

11-08-2008, 04:07 PM

رجليني بأول الدرج وجهي بأخر الدرج....هههههههه

وشلك بالكعب صندل ويالله السلام...

شفتوا كيف يا بنات الي يلبس الكعب في العرس يصرله زي ما صار لقاهرةالاسطوووووووووره وانا اشهد بالموقف انها اسطوره لن تنسى عبر تاريخ الاجيال...

مشعل بن ماجد

11-08-2008, 04:14 PM

شجعتيني اقول هذا الموقف اللي صار لي مع ثنتين من العضوات الموجودات معنا بالمنتدى لاكن اذا شرشحوني يا مشعل ابي احطها براسك<<<انتي قولي ويصير خير

لين الساعه 12 ليلا <<<خلوكم مدققين لين وليلا يعني ابو العاميه والفصحى حلو كملي بس هههههههههههههههههههه

عليهاوطلعنا نركض للشارع عشان<<<طيب ما عضيتوا على العبايه علشان ما تطوحون زي بعض الناس

طلع واحد ما نعرفه وراكبات معه غلط صراحه طاحت وجيهنا ومن البجاحه فينا هاوشناه وش موقفك كذا ونايم ( والله ما نستحي)<<<بعد وتهاوشونه والله لو انا لوديكم شارع ما فيه لا ابراج ولا لومزينات لأخليكم تمشون كعابي...

هههههههههههههههههههه سراب غطيتي على الكل بذكائك ولا طلعت بنوته معك حلو حلو .....

د.مزاجي

11-08-2008, 04:38 PM

بخخخخخخخخخخخخخخخخخخخخ <<<كاتم الضحك

بس والله قويه قاهرة
تخيل شكلك متكرفسه مع الدرج ولا المشكله تكمل عادي
هذي الثقه بالنفس تعلم يامعشر الفتيات منها

اما الثانيه الله يستر علينا وعليها
بس والله زين استناكم وانتم مارديتو عليه
لو غيره كان مافكر يرجع لكم

سراب

11-09-2008, 10:58 AM

شعيل على قولة بنوته

متأكده انك ماراح تفوت الفرصه وتبدا بالتعليق

لاكن استاهل ما اتوب

راحمه موضوعك مثبت ومشترط فيه التفاعل قلت يا بنت

اتحفيهم بموقف خفيف

لاكن الحين التوووووووبه التووووبه

ما راح اكتب شئ

البرنس زين مسكت لسانك

عموما ثاااانكس على تعليقاتكم العسل وامزح عليكم

ما اعرف ازعل ويمكن ارجع بفضيحه ثانيه تخص عضوه بتستانس

انت بالذات عليه

وباااااي يا مشرفنا المميز

مشعل بن ماجد

11-09-2008, 08:17 PM

شعيل على قولة بنوته متأكده انك ماراح تفوت الفرصه وتبدا بالتعليق<<<لا تصدقينها مجرد اشاعات

راحمه موضوعك مثبت ومشترط فيه التفاعل قلت يا بنت اتحفيهم بموقف خفيف<<<الله يخليك لشعب قولي امين...

ارجع بفضيحه ثانيه تخص عضوه بتستانس انت بالذات عليه<<<تكفين وهذا شيك مفتوح من نص ريال الى ريال وسلف بعد بس قولي...

وباااااي يا مشرفنا المميز<<<شهاده اعتز فيها وعلقها وسام على صدري واذا خلص الحفل اعلقها بالملحق وزخرفها بعد

سراب انا بنتظار فضيحة صديقتنا وزي ما قلتلك الشيك موجود...

P A R I S I A H

11-09-2008, 09:14 PM

هههههههههههههههآآآآآى احسن تستاهل هذي البحلقه وماتسوي
انا مره صار لي موقف رهييييييب اول سنه لي بالكليه انا قسم فيزياء داومت اول يوم كاشخه وجالسه بالقاعه ومحد قدي وكأن محد دخل كليه الا انا عاد خلصنا اليوم الدراسي الجميل وطلعنا ويوم جاء اليوم اللي بعده نفس الشي كشخت ورحت الكليه وانا رافعه خشمي تقولون رايحه مجلس الوزراء المهم فسخت عباتي واخذت الشنطه ورحت القاعه (هذا كله وانا رافعه خشمي) دخلت القاعه لقيت البنات داخلين والمحاضره باديه استأذنت من الدكتوره ودخلت ومالقيت مكان مافيه الاكرسي بأخر القاعه اخذته وجلست ساعه اسحب فيه عشان برووح قدام عشان اسمع الدكتوره زين وافهم معها (من زود الدفاره)المهم بدت الدكتوره تشرح وانا اتلفت يمين ويسار بشوف صديقتي فيه والا لا واذا بي اشوف البنات يختلفون عن البنات اللي كانو امس معي بالقاعه وانا ضر واركز مافيه فايده البنات مو هم والف واطالع الباب واشوف لوحه مكتوب عليها ثاني عربي يعني داخله قاعه مو قاعتي والادهى والامر انهم ثاني مدري وش نقزني لثاني وانا مالي يومين داخله الكليه ولابعد قسم عربي وانا فيزياء المهم انا توهقت مدري شسوي اهم شي اني اطلع من عندهم بس مدري شلون مادريت عن نفسي الا انا واقفه الدكتوره وقفت شرح وجلست تطالعني انا حسيت ان حركتي مالها داعي فجلست مره ثاني عاد تعالو شوفو وجهي ذيك الحزه قاعد يعطي الف لون ولون تقول لوحه رسام المهم شسويت انا؟ من الدلاخه عدت الحركه ووقفت مره ثانيه والدكتوره وقفت شرح وجلست تطالعني قلت بقلبي مافيه جلوس هالمره لازم اتصرف واتكلم لكن ماقدرت اقول شي ماادري وين راح لساني جلست الدكتوره تطالعني وتتفحصني واناقلبي يدق ويدق من الفشله والخوف والربكه بعدين قالت لي انتي جديده صح اول مره اشوفك قلت انا غلطانه جيت هنا للقاعه على بالي قاعتي لكن لقيتكم انتم قالت اهاااااا غيرنا القاعات اليوم بسبب عدد البنات(شوفوا البروود) قلت انا باااي بطلع واخذت خرابيطي وطلعت والله لايعيد ذاك اليووم صدق فشيله .... توبه هذا جزاء اللي يرفع خشمه مره ثانيه
وخلاااص عاد بااااي

مشعل بن ماجد

11-09-2008, 09:31 PM

هههههههههههههههههههههه...ترى على فكره البحلقه علامة الذكاء....<<<ايه صح

بعدين انتي مسويه نيوتن يوم انك ترفعين خشمك...

الا على طراي الخرابيط اللي اخذتيها اكيد شنطه ما فيها الا ملزمه والباقي ميك اب صوح ولا لا ومصروفك ريالين حقت الفسحه....هههههههههههه

بس من جدالله لا يحطني بالموقف هذا لاني انا استحي مره مره مره"ايه هين قابلني" يعني ما اقدر اقوم يمكن اكمل معهم موضوع المنصوبات والمبتدأ والخبر...

الـــ غ ـــلا

11-11-2008, 04:10 PM

ههههههههههههههههههـ مساكين انتو ومواقفكم الحمد لله ماعندي اي موقف محرج >>>> دايم متأنيه كل شي ولا استعجل باي شي دايم اروق واعرف افكر قبل اسوي اي شي مــــــــــــــــــــترهـ ثانيه ههههههههههههههههههههه مساااااااااااااااااااااااااكين

مشعل بن ماجد

11-11-2008, 07:19 PM

الغلا لو بحلف ان عندك مواقف اكثر مننا......

يالله يا بوووي ننتظر موقفك لا تجحدينا...

الـــ غ ـــلا

11-11-2008, 07:23 PM

ماعندي شي اصلا انا كلشي عندي بتأني عشان مااصير مثلكم ماعندي شي ابـــــــــــــــــــــــــــــــــــــــــــد

مشعل بن ماجد

11-11-2008, 07:42 PM

يا نصبي يا عالم...

اقول اثاري هذا نظامك تلعبين على نفسك يا المتأنيه عساك تربطين الحزام وانتي نايمه...

الـــ غ ـــلا

11-11-2008, 07:59 PM

ههههههههههههههههههههه تخيل اربط الحزام بعدين خلاص بدور لي موقف مع اني متأكده ان ماعندي واذا لقيت بقوله

مشعل بن ماجد

11-11-2008, 08:32 PM

شطوووووووووووره نستناك...

الرومنسي

11-12-2008, 12:46 PM

هههههههههههههههه
صراحه مواقف محرجة مضحكة وقد اعجبني موقف قاهره الاسطوره خخخخخخخخخخ لا وتقول كملي كأن مصار شي ههههههههه
صراحه المواقف كثيره لكن لي رجعه مره ثانيه

مشعل بن ماجد

11-12-2008, 09:18 PM

الرومنسي نستى مواقفك طال عمرك...

الرومنسي

11-14-2008, 07:42 PM

د.مزاجي

11-14-2008, 07:49 PM

هههههههههههههه
احمد ربك ماكمل وطب في بطنك

بس هالناس شلون مخلينه كذا
كان سويت نفسك مثله ومسكته وربطته بالجيب والباقي عليك

مشعل بن ماجد

11-15-2008, 06:52 AM

الرومنسي....هههههههههههههههههههههههه

عرس في بر؟؟؟؟؟؟؟؟؟؟؟؟؟ طيب بسألك هو عرسك يوم انك تترزرز بالبشتـــــــــ،

بس على العموم مجدي وش سوى فيك يا خوك قاهرني وشوله لابس بشت لو انه اخوك المعرس لا احد يلبس بشت...ههههههه

**اموره

11-15-2008, 05:39 PM

هههههههههه عليكم مواقف تفشل

مشعل بن ماجد

11-16-2008, 12:32 AM

الله يفشل ايامك بالخير

وين موقفك يا عثلــــ،

الرومنسي

11-16-2008, 08:28 PM

البرنس خخخخخخخخخخخ عاد بطني تبية يكمل الناقص انا بلشان في نفسي ازين البشت والشماغ هههههههههههه

مشعل (نعم عرس في بر ليه مستغرب خخخخخخخخخخ،، صراحه قويه ) صراحه مدري ليه حبكت معي ذاك اليوم الا البس البشت ههههههههههه

اموووره خخخخخخخ هاااااااااااه مواقف تفشل يلا اشوف هالمواقف السنعه شكلها بلشت ماعندها شي هئ هئ هئ هئ

{ غفـوة ح ـلمـ ●•

11-17-2008, 12:23 PM

ههههههههههههههههههههههههههههههههههههه
مواقف حلوه بس انا بقول موقف طازج صار لي بدايه السنه الدراسيه ذي ((( شاطره انا وبنت خالتي لــ ح ــن دفاره فينا كل شي بالدراسه ))
المهم انا اول يوم لي بالكليه انا وبكل فخر قمت الصبح وتجهزت للكليه العزيزه اول سنه فرحانه خلصت ثانوي المهم واروح للكليه بدري قبل
ما اسمع صوت العصافير >>والله ما فيه غير صوت حفريات من وين العصافير
المهم رحت ودخلت وفصخت العبايه وجلست لي على كرسي انتظر صديقتي المهم بدو يدخلون البنات القاعات وانا ما جت صديقتي فصار لازم ادخل
رحت ولقيت وحده اعرفها قلت لها بتدخلين قالت لا قلت بجلس معك قالت انا لاني بحول من قسم لقسم ما حددو قسمي عشان كذا مو حاظره
قلت انا معك يالله بس خل نفرفر المهم وتبداء الفراره وبينما كنا نسعسع في ممرات الكليه قابلتنا دكتوره مصريه وقالت انتم مستوى ايه ؟
قلت لها اول قالت قسم ايه ؟ قلت رياضيات قالت امل مش في قاعتكم ليه ؟؟ قلت حنا بنروح للقاعه اصلا >>انواع الكذب
وتمر علينا مصريه ثانيه ونفس الكذبه اقول لها و اشرت على اخر الممر واقول قاعتي من هناك بروح لها
وبعد شوي جت لمنا دكتوره سعوديه وقالت وين قاعتكم ليه ما دخلتو وهي مطيره عيونها و لابسه عدسات زرق يخرعن المشكله سمراء ما يركب
المهم انا قلت مشت الكذبه على المصريات بتمشي على ذي وبكل ثقه رفعت يدي واشرت وقلت هناك بنروح لها قالت لي بلا كذب هناك مكاتب الاداريات ومكتب العميده
انا طاح وجهي ما ادري وس اسوي عاد بصرف لفيت للي معي وقلت شفتي اقول لك مو من هنا وانتي الا غصب هنا شفتي ضيعتينا يالله امشي لا نتأخر >>>وش رايكم مو احلى تصريفه
وبالاخير طلعنا الساحه الخارجيه ولا دخلت ولا محاظره شوفو الشطاره اول يوم طلعت وانا ما ادري وين فيه قاعتي اصلا ولا دري وش عندي من محاظرات
هع هع هع مشعل لا تظحك والبرنس بعد لا تظحك موقفي حصري للبنات هم بس اللي يظحكون
تقبل مروري

{ غفـوة ح ـلمـ ●•

11-17-2008, 12:31 PM

بس صراحه احلى المواقف موقف الرومنسي وموقف قاهره الاسطوره
حرام الرومنسي رحمتك اتخيل كشختك وانت داخل وذا جاي لك
مسكين دوم ان شاء الله لكم المواقف المحرجه ولي المواقف الحلوه و المفرحه >>>ام النذاله وابوها وجدها وعمها وخالها وكل العائله الكريمه هع هع هع

مشعل بن ماجد

11-17-2008, 01:44 PM

والله ما فيه غير صوت حفريات من وين العصافير<<<ههههههه والله انك صادقه

بس من جد تصريفتك حلوووووووووووووووووووووه بس يا ليتها صاترتك علشان تعرفين تنصبين...

اما من ناحية اضحك لا منيب ضاحك بس يمكن اموت من الضحك...هههههههههههههههه

الله لو تشوفين لنا كم موقف على لحن وغلا راح نكون من الشاكرين...

و يسلموا على هيك موقف...

P A R I S I A H

11-17-2008, 02:03 PM

انا بقول لكم موقف عن الــــ غ ـــــلا مره كنا مجتمعين حنا وعمامي كلهم
وكنا جالسين احنا البنات جتنا جدتي قالت كل البنات يجون عشان يسلمو على عمامهم
رحنا لهم وكانو فارشين فرشه وجالسين كلهم(عددهم سته) جيت وسلمت عليهم وسلمت اللي بعدي واللي بعدها لين
جاء دور الغلا
وانا واقفه جت الغلا وسلمت عليهم وعلى بالها مسويه ثقيله ثقل العالم كله فيها ويوم خلصت رجعت على ورى عشان اللي بعدها تسلم
وهي ترجع وتوزع ابتسامات مادرينا الا بالبنت تشقلب على ضهرها (جاكي شان) لانهم كانو حاطين كرتون عشان يمسك الفرشه لاتطير
وهي مادرت عنه رجعت ورجعت لين صقعت الكرتون وتشقلبت عاد تعالوا شوفوني على طوووول انفجرت كاااااااااااككككككككككك هههههههههههههههههههآآآآآآآآآآآآآي
خخخخخخخخخخخخخخخخخخ هههههههههههههههههههههههه انواع الضحك خصوصا انهم كلهم اخترعو مايدرون وش السالفه قامو على طول
واللي يسمي عليها واللي يسألها وش جاك شي يعورك كل هذا وانا مازلت ميته من الضحك لانها كانت متفشله ووجهها يعطي الوان
المشكله انا استحي من عمامي مره بس ماادري وين راح الحياء على الضحك اللي ضحكته
بس قسم قسمات شكلها كان ابداع كل ماذكرتها امووت من الضحك

{ غفـوة ح ـلمـ ●•

11-17-2008, 04:08 PM

والله اشوف لك مواقف ل لــ ح ــن او الــ غ ــلا
ليه احد قايل لك اني بايعه عمري او مقرره الانتحار
والله ان كتبت عنهم بيذبحوني هو فيه مواقف كثيره
واحلى شي مواقفنا مع بعض اذا اجتمعنا (( طبعا اجتماعنا اذا حجت البقر على قرونها ))
بس ما اقدر اقولها اخاف من المشتركات بالجريمه معي يموتوني >>>يعني تختلف عن يذبحوني

الرومنسي

11-17-2008, 05:14 PM

خخخخخخخخخخخخخخخخخخخخخخخخخخخخخخخخخخخخخخخخخخ
صرااااااااااااااااااااااااااااااااااااحه مواااااااااااااااااااااااااااااااااااقف مززززززززززززحكه
عش كثير تشوووووووووووووف كثير

الـــ غ ـــلا

11-17-2008, 09:22 PM

يخرب بيتك والله زين اني دخلت اشوف المواقف لكن هين هين اوريك ياشينه الحلايا اصبري ترا مواقفك لاتعد ولا تحصى والله ماافوتها لك >>>>> منصدمه ماتوقعت انها بينكتب لها موقف هنا
هين والله ماافوتها بس اصبري علي يا ام كرتون

مشعل بن ماجد

11-18-2008, 06:26 AM

لحن قسم قسمات انك عجبتيني ولا عليك من احد...

بس بشري عسى الكرتون ما تعور من الغلا؟...<<<قسم قسمات اني خايف عليه هههههه

اجل مسويه الغلا انها ثقيله والله عندها امل يا خذون عنها انها اعقلت<<<حلم ابليس بالجنه...

طيب وخروا شوي ابي اضحك على الغلا وخرو بعد شوي عطوني مساحه ابي اضحك وخروا

هههههههههههههههههههههههههههههههههههههههههههههههههه هههههههههههههههههههههههههههههههههههههههههههههه
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههه
هههههههههههههههههههههههههههههههههههههههههههههههههه هههههههههههههههههههههههههههههههههههههههههههههه

خلاص يكفي ضحك

يسلموا لح لح على القصه قسم قسمات انك كذا

مشعل بن ماجد

11-18-2008, 06:30 AM

عنيده والله انك خوافه...

بس انا عندي ثقه وبعد كلي انا ثقه بــ لحن انها بتقولنا حتوته عنك بتخلي اللي مايشتري يتفرج عاد وش يفكك مني...ههههههههه

مشعل بن ماجد

11-18-2008, 06:37 AM

والله يا الغلا انا حزنت عليك لمن دريت انك طحتي على الكرتون<<<بسم الله عليك

وانتي عارفه اني انا معك قلبآ وقالبا وانا بعطيك معلومه ان السن بالسن والبادي اضلم...

علشان كذا قوليلنا موقف على لحن خذي حقك منها...

لا حول ولا قوة الا بالله

استغفر الله واتوب عليه

الله يصبرنا على فعل الخير...

{ غفـوة ح ـلمـ ●•

11-18-2008, 09:54 AM

هع هع هع هع
لا لــ ح ــن ولا الــ غ ــلا بيقولون عني شي
انا اعرف بنات خالتي >>>>>يا رب سترك
انت بس لا تقعد تنجسهم علي ما عليك يا نذلك

الزعيم

11-18-2008, 01:09 PM

ههههههههههههههههههههههههه المواقف هذي تحصل مع كل الناس

مشعل بن ماجد

11-18-2008, 06:08 PM

الزعيم مشكور لمرورك وننتظر موقفك...

الـــ غ ـــلا

11-18-2008, 06:17 PM

مشعل
أولا//ً دوم الضحكه
ثانياً//انا ماطحت من كرتون !!
أنا طحت من (علبه، قوطي) الغاز مدري اي وحده صح
ثالثأً// لاتوصي حريص لحنوه انا اوريك فيها بس اصبر علي
وعنيده بدور لها موقف واقوله
وانت اشوف فيك يوم

مشعل بن ماجد

11-18-2008, 06:36 PM

هههههههههههههههههههه

لا حرام لا تدعين علي...

بس لاتنسين مواقف لعنيده ولحن...

P A R I S I A H

11-18-2008, 08:16 PM

يااخ مشعل خلاااااااااااااااااااااااااااااص يكفي ياطماااع
قلت لك موقف واحد يكفي
اعوذ بالله منكـ الا تبي الناس يظحكون علي واتفشل انا
.................................................. ...

{ غفـوة ح ـلمـ ●•

11-18-2008, 08:22 PM

هيه غلاوتي
لا عاد وانا اقول بنوتات خالتي ما يقولون شي
لا تتنيذلين علي وتشمتين الاعداء
انا ما قلت شي عنك اختك قالت عليك فيها
واذا تبين اجيكم البيت واساعدك ما عندي مانع
اوريك فيها بس لا تتكلمين عاد

الزعيم

11-18-2008, 09:36 PM

اما انا كانت واصله معي بانزل من السياره الى المدرسه وشوي وانا اخذها على وجهي تعلق الثوب في السياره بس اشوا ماكان فيه الا طالب واحد هو اللي مامسك نفسه ضحك

آدّمنتْ ح’ـبڪَ

11-20-2008, 04:06 AM

وش رايكم بقاهره المجرمه

مره من المرارير الوالده الله يطول بعمرها بالمطبخ وانا من قرادة امي جيت عندها

المهم فتحت امي الثلاجه وجلست بتجيب اغرآض من تحت انا فتحت الفريزر وخليته مفتوح دلاخه هع هع

قامت امي بسرعه مستعجله بتسوي طبختها ما شفت إلا الثلاجه تهتز وامي ماسكه راسها

انا انصرعت ضحك وبنفس الوقت خفت على امي لان الضربه جااااامده

المهم جاء العشاء وطلعنا للبر نتعشى نزلوا كل اللي بالسياره الا انا انتضر امي << ليتك فكيتيها من شرك خخخ

فتحت امي باب السياره من وراء وكان الباب اللي فيه حاجه تمسكه على شان مايقفل خربان قالت امي امسكيه

مسكته شوي وفكيته تناحه ما دريت إلا الباب طــراااااااااااااااااااااااااااااااااااااااااااااا ااااخ براس امي تنحت ثانيتين بالموقف

وبعدين استوعبت بعد ماشفت امي ترافس من وراء الباب خخخخخخ

طلعت الوالده والحمد لله <<<وش عقبه

الرومنسي

11-20-2008, 06:47 AM

خخخخخخخخخخخخخخخخخخخخخخ
قاهره ياريت امك سلمت منك خخخخخخخخخ صرتي لها عقدة هههههههههههههه
يسلموووووووووو
على هيك مواقف مزحكة

{ غفـوة ح ـلمـ ●•

11-20-2008, 04:49 PM

السلام عليكم ورحمة الله وبركاته
المواقف كثيره لكن ابي اختار لكم هذا الموقف الذي لن انساه
فيه مره من المرات كنت معزوم على فرح وكان هذا الفرح في البر في مخيم وبعد وصولي الى الحفل
كنت انا جاي على جيب آخر مديل في ذاك الوقت قبل حوااااااااالي ثلاث سنوات تقريبا ،،،المهم
وقفت الجيب امام المخيم كأن مافيه واحد راكب جيب الا انا خخخخخخخخخ الدنيا ارزااق المهم
نزلت من الجيب لابس بشت وأنا داخل المخيم الا ذاك الرجل متجه بسرعه نحوي انا مأعرفه
المهم الرجل على طول مسكني وشالني فوق وضربي الأرض دون مقدمات او أي كلام وأنا مندهش من الموقف
البشت طاح والشماغ والثوب انعفس والشخصيه التي كنت باز بها راحت خخخخخخخخ ،،، نرجع للموضوع اثاريه المسكين
مريض نفسي الله يشفيه ،، ضحك علي بعض الحضور وخاصه الشباب وكان موقف محرج لي امام الجميع
هذا وسلامتكم والباقي مع الطريق،،،،،،،،،،،،،،،،،،،،،،،،،،،،،،،،،،،،،،،،،،،، ،،،،،،،،،،،،،،،،

انا صار لي موقف اليوم والسبب الاخ الرومنسي وموقفه اللي كاتبه هنا
انا عجبني الموقف اللي صار له وكل ما تذكرته قعدت اضحك عليه
المهم اليوم انا وامي واخي الكبير العزيز جالسين نشرب اقداح من القهوه >> جمع قدح >>>فناجيل >>فنجال >> فهمنا اخلصي بس
وامي تسئل اخوي عن اصدقاه يتكلمون عن واحد من اصدقاه متزوج في العطله وامي تسئله من وين ماخذ ومن بنته والاسئله المعهوده >> لقافه عارفه
المهم اخوي قال لامي لا هذا مو اللي متزوج في العطله انا اتكلم عن اللي متزوج في العطله اللي حظرت زواجه هو يوم قال حظرت زواجه
تذكرت موقف الرومنسي وقعدت اضحك بقوه اخوي ناظر فيني وبعدين قال لامي الله يخلف عليك يا يمه طبعا يقصد الله يخلف عليها فيني انا >>> ما عجبته هع هع
وقعد يناظرني وانا للحين اضحك المشكله اضحك من قلب وجهي صار احمر وعيوني تدمع قال خير عسى ما شر انهبلتي :oo5o.com (19): قلت لا ما انهبلت قال كل ذا ولا انهبلتي الله يستر بس
عاد انا ما قدرت اسكت من الضحك عشان كذا
قمت لغرفتي وتركتهم
كله منك يا الرومنسي اخوي يحسبني مهبوله ومطفوقه شوهت صورتي عند اهلى :eh_s(2): :eh_s(5): :oo5o.com (20): :eh_s(14):

مشعل بن ماجد

11-20-2008, 05:05 PM

هههههههههههههههههههههههههههههههههههههه

سلامت امك ما تشوف شر<<<الاو الله بتشوفه ادام المتنحه بنتها

بعدين عن الفهاوه والمشكله ماتمسك معك الا امك

شوفي عندك لحن والغلا وعنيده تكفين عنيده عندك فيها تنحي عليهم لمن تقولين بس...

يسلموا...

مشعل بن ماجد

11-20-2008, 05:23 PM

كله منك يا الرومنسي اخوي يحسبني مهبوله ومطفوقه شوهت صورتي عند اهلى :eh_s(2): :eh_s(5): :oo5o.com (20): :eh_s(14):

لا انا اعتقد اهلك عندهم شك انك مهبوله الحين ايقنوااااا

{ غفـوة ح ـلمـ ●•

11-20-2008, 06:44 PM

شوفي عندك لحن والغلا وعنيده تكفين عنيده عندك فيها تنحي عليهم لمن تقولين بس...
لا انا اعتقد اهلك عندهم شك انك مهبوله الحين ايقنوااااا

مشكور يا اخ مدحت وما قصرت يجي منك اكثر >>> بحسسه بالذنب هع هع هع

مشعل بن ماجد

11-20-2008, 08:33 PM

ههههههههههههههههههههههههههههههههه

من جد حسستيني كنت مقصر يبيلك اكثر من كذا بواجد....

{ غفـوة ح ـلمـ ●•

11-20-2008, 11:38 PM

الله يعافيك لا تحس بالذنب خلاص هونت خخخخخخخخخخخ
اذا حسيت بتسوي اكثر الله يستر بس

الـــبارونه

11-21-2008, 02:13 PM

اذكر مره في المدرسه كان عندنا بلاغه وكنت مالي خلق المعلمه ولا الماده المهم قبل ماتدخل المعلمه قلت لصديقتي وش رايك نهج من الحصه قالتلي يالله المهم طلعنا وماعندنا من الشيطان طريق وجلسنا في درج الطوارء لان ماحد يطلع معه المهم ملينا وحنا جالسين وقلت لصديقتي كم بقا وترن قالت تقريبا عشر دقايق قلتلها اجل قومي خل ندخل قالت صديقتي واذا اسئلتنا وين كنتم وش نقول قلت نقولها كنا عند معلمه
(س)قالت صديقتي خلاص المهم رحنا طقينا الباب قلنا ممكن ندخل قالت وين كنتم قلنا عند ابله (س)قالت مشالله كل هل وقت عند ابله (س)قلت ايه يعني نكذب عليك قالت لا بسم الله عليكم انتم تكذبون بس ماكان ابله (س) غايبه قلت هاهاها عاد دورونا ماتلقونا صدق لاقالو الكذب حبله قصير

مشعل بن ماجد

11-21-2008, 05:10 PM

هههههههههههههههههههههه

احلاكم ساد<<<احسن

هذا النصب الحين بعرف اذا نحشتوا وناسه احس انها مرمطه على الفاضي

اجلسي بالفصل وطنشي ولا كأن احد حولك وهوجسي سويلك كم مشروع او خذيلك كم حلم يقظه على الطاير...

الـــبارونه

11-21-2008, 06:18 PM

ياليتهم يطيعون يخلونا ننزل روسنا علي الطاوله مخالفه من الدرجه الاول فالنحشه احيانا مايدرون وحيانن ننكمش

P A R I S I A H

11-22-2008, 05:17 PM

هههههههههههههههههههآآآآي احلاكم
مابعد عقلتي وتركتي هالحركات

الـــ غ ـــلا

11-23-2008, 01:18 PM

احلاكم العقل نعمه الى متى وانتي كذا خلاص اعقلي>>>> روحي مناك ياشيخه

د.مزاجي

12-16-2008, 02:25 PM

ههههههههههههههه
والله طلعتي منتي سهله
والله النحشه من الفصل وناسه
بس مالنا غير الحمامات
واذكر مره دخل علينا المدير
وتناحشو كل واحد بحمام
وكليتها دفك ولبى على قولت عصام

بس عادي تعودنا

الرومنسي

12-17-2008, 03:47 PM

انا صار لي موقف اليوم والسبب الاخ الرومنسي وموقفه اللي كاتبه هنا
انا عجبني الموقف اللي صار له وكل ما تذكرته قعدت اضحك عليه
المهم اليوم انا وامي واخي الكبير العزيز جالسين نشرب اقداح من القهوه >> جمع قدح >>>فناجيل >>فنجال >> فهمنا اخلصي بس
وامي تسئل اخوي عن اصدقاه يتكلمون عن واحد من اصدقاه متزوج في العطله وامي تسئله من وين ماخذ ومن بنته والاسئله المعهوده >> لقافه عارفه
المهم اخوي قال لامي لا هذا مو اللي متزوج في العطله انا اتكلم عن اللي متزوج في العطله اللي حظرت زواجه هو يوم قال حظرت زواجه
تذكرت موقف الرومنسي وقعدت اضحك بقوه اخوي ناظر فيني وبعدين قال لامي الله يخلف عليك يا يمه طبعا يقصد الله يخلف عليها فيني انا >>> ما عجبته هع هع
وقعد يناظرني وانا للحين اضحك المشكله اضحك من قلب وجهي صار احمر وعيوني تدمع قال خير عسى ما شر انهبلتي :oo5o.com (19): قلت لا ما انهبلت قال كل ذا ولا انهبلتي الله يستر بس
عاد انا ما قدرت اسكت من الضحك عشان كذا
قمت لغرفتي وتركتهم
كله منك يا الرومنسي اخوي يحسبني مهبوله ومطفوقه شوهت صورتي عند اهلى :eh_s(2): :eh_s(5): :oo5o.com (20): :eh_s(14):

هههههههههههههههههه
عنيده
عن جد ضحكت منك لكن معليش تعيشين وتاكلين غيرها خخخخخخخخ باقي عندي موقف ترقبووووووه عن قريب
بس هاااااااااااااه مو يصيرك نفس الموقف الأولي ههههههه
يسلموووووووو

د.مزاجي

01-01-2009, 04:52 PM

والله شفت الموضوع وقف قلت احركه شوي لعل وعسى الاعضاء يحسون على دمهم ويحطون مواقفهم

المهم امس كنت اطالع قناة السودان كان فيها سرك قديم الي يحط بفمه غاز ويولع ومادري ايش المهم
عجبتني الحركه واتجه إلى مختبر ديكستر <<متأثر من ام بي سي3
المهم واروح للمغسله واخذ علبت كلونيا
واروح لبيت الشعر واخذ مدري وش الي علبه صغيره وفيها غاز ويشبون بها الحطب
المهم
واروح غرفتي
وارش على المرايه واولع وطلع شكلها فللللله
وارش شوي على يدي واولع والله وناسه يعني تخيل نار بس ماتحرق
المهم عجبتني الدعوه مابقى شي بالغرفه إلا جربت به
لين جتني فكره جهنميه
واخذ العلبه وكان باقي بها
النص
المهم وارش يديني ونصف جسمي يعني كثرة والثوب تغسل بالكلونيا
وتقترب لحظة الصفر واولع واولع
يعني تخيلو والله شي موب طبيعي واخذ البطاني واخم ابوها بس على طول طفت
وانا كنت متوقع بطول
والمشكله الوالده بالله شافت علبت الكلونيا فاضيه
واعتقد انها
ظن ظن السوء
والمشكله لو اقول وش سويت بودوني مستشفى الشهار الي بالطايف
ولو اقول شربتها بيودوني للمقبره
وتوته توته خلصة الحتوته

{ غفـوة ح ـلمـ ●•

01-01-2009, 05:39 PM

خخخخخخخخخخخخخخخخخخخخخخ
هههههههههههههههههههههههههه
صدق منت صاحيلو ودوك لشهار ما راح يقبلك
اما تولع في نفسه والله خبال على اصوله
بس صدق ما تحس بحرارت النار >>عجبتها السالفه
الحين من اللقافه تحرق البيت كله خخخخخخخخخخ

الـــبارونه

01-01-2009, 05:51 PM

شااااااطر مو كل مره تسلم الجره
جربتها مره ومرتين ولا سوتلك شي
تقوم تشب بنفسك بايع عمرك
اقول لاتفتح علي قناة السودان ابد
افتح علي مصر التعليميه
ههههههههههههه

د.مزاجي

01-01-2009, 08:14 PM

هههههههههههه
ايه عنيده ولا احسن شي تكونين بالمطبخ يم الغاز

ورشي عليه وعليك
خخخخ وقابليني اذا دخلتي المنتدى مره ثانيه

احلاكم
والله ترا غناة السودان مفيده بعد هالسرك الي حطوه
بخليها رقم واحد بالرسيفر
غطت على ام بي سي
اما مو كل مره تسلم الجره والله انك صادتزه
بغيت اروح دجاج ع الفحم بسبتها بس لا لا الله ثم هالبطانيه
الي انقذتني كان ماكتبت هالرد

P A R I S I A H

01-02-2009, 12:29 AM

ههههههههههههههههآآآي
البرنس ياأبضاي شو هالحركات لو درو عنك حقين السرك اخذوك
وخلوك رئيس الفرقه بعد

مشعل بن ماجد

01-02-2009, 02:36 PM

ههههههههههههههههههههه

شفت شلووون تلومني اذا قلتلك مهبوووول...

منت صاااحي لعنبوا داااارك في احد يولع بعمره

لا جد وش جااايك انت...

الظاهر خلاص طاب خاطرك من الدنيااا

..............................

الـــبارونه

01-02-2009, 09:01 PM

واحد يتبرع ويقول موووووقف

{ غفـوة ح ـلمـ ●•

01-03-2009, 01:58 PM

شوفو بكتب لكم موقف صار لي يوم كنت في ثالث ثانوي يعني في السنه اللي مضت
المهم انا و صقيقت عنيده وملاك وشكلي هلاك فيه مدرسه تقهرنا وهي مدرسه لعربي
المهم هي تدرسنا ادب و نحو جت عندنا وعطتنا مادتها وقالت بكرى جيبو ادب
وهي اساسا ما لها حصه عندنا بكرى عاد حنا انهبلنا ويوم جينا ننزل شفناها هي و مجموعه معلمات ينزلون
عاد انا وملاك قلنا خل نعاندها هي ما تطيق احد يطق بالعلك عاد انا وملاك وراها نمشي ونطق بالعلك بقوه
هي اول شي ما همها لاكن يوم طولناها لفت وعرفت انه حنا انا وملاك مسوين بريئين لفينا ورجعنا
يوم جاء من بكرى جت وقامت الاخت ملاك العزيزه وقالت ما جبت ادب انتي مو عندنا اليوم قالت
انا قايله لكم امس جيبوه قالت ما سمعت قالت ايه لو تتركون العلك والطقطقه فيه كان تسمعون وتفهمون
وملاك ةواقفه وانا جالسه وصقيقتي جالسه يعني شاطرات جايبين ولفت تناظر فيني وتميل منقهره مني شكلها
و صقيقتي جتها الدفاره ومسويه ترى ما انتبهت وقاعده تكتب توها ما بدت الحصه بفهم وش تكتب بس تبي تصرف ما تبي تناظرها
وانا بكل ثقه عيني في عينها تناظر وتميل تبيني الف عنها ولا همني اناظرها بكل برائه يعني ترى ما سويت شي
ولا تبنا في نفس اليوم بأخر الدوام رحنا عند غرفه المعلمات وكل وحده في فمها علكين وانواع الازعاج و الطقطقه
تخيلو من بعدها صايره ما تطيقنا من تدخل لين تطلع تناظرنا نظرات تقهر احول وش مسوين لها الحمد لله افتكيت منها

ملاك وشكلي هلاك

01-03-2009, 02:14 PM

هههههههههههههههههههههههههههههههههههههه
ههههههههههههههههههههههههه
ههههههههههههههههههههههههههههههههههههه
ههههههههههههههههههههههههههههههههههههههههههه
ههههههههههههههههههههههههههههههههههههههههههههه
الصــــــــراحـــــهـ مــــــوقف جــــــــدا جميــــل اذاكنت تعاااند احدوهو مايحبك صراحه اناا اتلذذ بهذه الاشيااء >>>>>
أكــــــــــــــيد صديقتي عنيدهـ عشااان كذاا صرت احب اعاااااند

الـــبارونه

01-03-2009, 03:12 PM

عنيده توني ادري ان عندك حركات المواحن
الله يكفينا شر المواحن

بما انك جبتي طاري المواحن عاد انا خوذي وخلي من المواحن

وخاااااااااااصه المدرسات اموت علي امواحنهن

اذكر يوم اني في ثالث متوسط كان عندنا رياضيات
والحصه الاخيره اتفقت انا ومجموعه بنات علي الهجه
المهم هجينا ولا لقينا مكان نجلس فيه ساتر ماحد يشوفنا
المهم جلسنا بلحوش علي المسرح فله سواليف وضحك وتعليقات
خوذي وخلي المهم انتصف الوقت وحنا جالسين اطاعت لنا المعلمه الرياضيات
وحاطه ايدينها علي جنوبها (خصرها)
يوم شفناها طاحه قلوبنا وهي كانت بعيده عنا وتجلس اتصارخ علينا وحنا ساكتين
ومار تودينا الاداره وكمان الاداره خوذي وخلي من الهواش
ومار نرقا فوق وكل وحده يعنني مانناضرها ولا شي
قالت بسرعه طلعو الرياضيات والي امر من عندها ولا طلعت ياويلها
ويشتغل المواحن قلت مار والله ماطلعه الا اذا جت عندي
وانا جالسه حاطه رجل علي رجل والعب بشعري اقهرها
وهي تدور امهم قربت من جهتنا وبدت تفتش علي الواجب وجلس ادور بشنطه وين الكتاب مافيه
ونهبل وين طسله ودور بدرج وجت عندي وانا كلي حوسه ادور منا ومنا
وهي مطيره عيونها علي وتهوش ليش ماطلعتي وش انا قايله
بعد معناه من التدوير لقيته طايح تحت الطاوله من الخوف انا قلت خلاص هذا هو
وفتح الدفتر بسرعه علي الواجب الاش ويتقطع وتجلس تهوش حل الواجب خطا
قطع كان ذاك اليوم كله اهواش
الله لايــــــــــــــــــــعوده من يوم لا وكان يوم الاحد بعد بس التاريخ ماعرفهوووووووش
هههههههههههه

{ غفـوة ح ـلمـ ●•

01-03-2009, 04:11 PM

بالعكس احسن شي العناد خاصه مع المدرسات له طعم ثاني
كل وحده منقهره ومتعقده من رجلها تجي تطلع حرتها فينا ويبونا نسكت :eh_s(5): :eh_s(5):
ما عندنا شي نسويه غير نعاندهم ونقهرهم اغلب عنادي بالنظرات
خوافه حدي مناظر ما اقدر على الكلام خخخخخخخخخخخخخخخخخ

اجل هاوشوك يا عمري عمرك شكلك تروعتي منها
ههههههههههههههههههههههههههه

الـــبارونه

01-03-2009, 04:31 PM

يوم الموقف كنت متروعه لكن الحين اذا ذكرته اضحك

وانتي الصادقه ارجالهم ينافخون عليهم ويحطون حرتهن بنا

مواطن

03-02-2009, 12:23 PM

بالعكس يااختي الفاضله واصلي قد ماتستطيعين لان الشيطان يبغى يثبطكي ولاكن فوتي عليه الفرصه

مْ،ـاِأنْس‘ـاكَـ

03-19-2009, 11:10 AM

اليوم جايب لكم موقف لي في أول يوم في الشركة

كنت متوظف على أني موظف إستقبال ، وكان جهاز الإستقبال عندنا معقد وتعرفون كنت أبي أسوي فيها فاهم ، المهم دقت زوجة مدير قسم وفي نفس الوقت دقت زوجة موظف ثاني ، المهم لخبطت أم الدنيا وحولت حرمة المدير للموظف والموظف للمدير لا وقايل لهم إن زوجاتكم على الخط

هع هع هع

سـآيلنت

03-22-2009, 07:21 PM

انا بقووول الموقف هاذا صار معاي في المدرسه

كان يووم سبت عاد يووم السبت ثقيل انتو اخبر <<< لا يكثر ادخلي في السالفه هههههههه

المهم وكان علينا جغرافيا وانا خلاااص واصله حدي ابي انام كنت مو اصله

والبنات طفشانين

المهم واقوووم اقلد ابلة الجغرافيا لما تشرح

انتوو يلي ورا انتبهو معي ملاك انتبهي معي <<< كن مافي في الفصل الى انا الشكوى لله

ههههههههههههه

واقلدها في شرحهها وحركاتها

المهم <<< ياكثر ماتقووول المهم هههههههههه

ع العموم والبنات حاولو ينبهوني انها ورايه

وانا مانتبهت

انا لما شفتها طاح وجهي

ورحت اجلس مكاني <<< يعني انها ماسوت شي ههههههههه

طبعا قالت اليوووم الي يشرح الدرس ملاك

وخلتني اوقف مكانها

وهيه جلست مكاني وتقوول انا طالبه وانتي معلمه

وقمت بنت ابوها اشرح

يابنااات انتبهو معي <<< صدقت نفسها ههههههههههه

يابنات الدرس هاذا ماتختبرون فيه

ومافي واجب

والكل ضحك وماشرحت لنا الدرس

تحيااااااتي لك

الرومنسي

03-22-2009, 07:24 PM

هههههههههههههههههههههه
حلوه ملاك
بدايه موفقه
يسلموووو

سـآيلنت

03-25-2009, 09:42 PM

الرومنسي

دوووم الضحكه عساها ماتفاقكك

امااا بدايه موافقه فهيه موفقه هههههههههههه

جـنـgטּξــأشقه

03-26-2009, 09:45 PM

ما انساك وش سويت انت خخخخخخخخخخــ

زين ماانطردت بس

ملاك لك مستقبل بالجغرافيـــــــــــا ههههههههههههههههههههه

هذا موقف حصلي يوم العيد الموهم

كنت جالسهــ ناداني عمي قالي خبلهــ تعاالي ماشفتك >> بيسلمـــ

واجي مفحطهــ وامد يدي وهو مسك يدي ولا عااد فكها المشكله وين

انه واقف عند باب مجلس الرجاال فطبيعي انا جايه له راح يكون باب المجلس مقابلني

انا اطالع الا داخل المجلس ولد عمي >>> انوااع الاحرااج عمي ماسك ايدي ابي اسحب ايدي مو قاادرة

ولد عمي يطاالع طبعا لحظتها وجهي طاالع كوووكتيل مشكل خخخخخخخخخخخخخخخخــ وبس ..

سـآيلنت

03-27-2009, 05:07 PM

يوووووووووووه احرااج ههههههههههههههههههه

لوووووووووول <<< فاطسه ضحك ههههههه

يسعد قلبك

ودي ووردي

سـآيلنت

03-27-2009, 07:44 PM

بما انه المووقف هاذا صار لي قريب حبيت اقلكم عنه

مرره كنا في السووق وولد اختي معانا المهم والولد طفشااان ياماما نبي نرجع البيت

بختصار غثنا في السوووق

لما نزلنا مع السلم الكهربائي وهو ماسك يدي وخااايف

وشااف من بعيد دبدوب يشبه دبدوبي قااالي ياخاله مي مي << صعب عليه اسم ملاك هههههه

ويقووول مي مي دبدوبس << الاخ اعجمي ههههههه

وهوه متفاعل مع الموضوع وانا اكلم اختي وطااااح

عاد انا اموووت في المواقف هاذي

وربي ماشفته الى اخر اسلم ويبكي <<< صراحه قطع قلبي

وينزل اخووي يشيله وكان يصارخ في السوووق خاله مي مي ماتمشي معانا

وفشلنا بين خلق الله ويصارخ مي مي بعدي والناااس كلها تطالع انا استحيت الكل يطالع فيني

ويمسك الحارس الي عند الباب ويقووول خاله مي مي حطها في السجن لانها خلتني اطيح

وانا ماسويت شي هوه الي طاااح

وصلنا السياره نبي نركب وهاذا ماااافي لا تركبين معانا

ولما وصلنا البيت راح يتمسكن عند امي <<< غارت منه ههههههههه

مْ،ـاِأنْس‘ـاكَـ

04-02-2009, 10:37 PM

هع هع هع

خاله مي مي

ياحبي للأطفال

سـآيلنت

04-10-2009, 04:54 PM

ماأنساكـ

حبتـــــــــــــك العافيه يالغالي

kemo0000

07-29-2009, 06:06 PM

حصلت القصة قبل 29عام عند اول ايام زواجي وهي كالتالي
في شهر العسل والدنبا ما هي سايعتني ققنا الذهاب الى احد المناطق وجهزنا امورنا وتوجهت ال المطار برفقة الحبيبة زوجتي وكان الكلام كله عسل بعسل واخر رومانسية ودوبان في الحبيبة المهم رحت الى كاونتر المبيعات وكلمت الزميل لأصدار التزاكر وسمت على باقي الربع ومن ثم رديت الى التذاكر وقلت له ايش تتوقعوا........................................... ....................
خلصتي يا روحي ومن غير شعور الزميل قام يضحك ويضحك وقال لا يا حياتي وانكسفت واحرجت وكانت تعليقة ساخرة علي ال يومكم ذا وكل ما يقابلني يقول لي خلصتي ياروحي .......... هههههههههههههههههههههههههه...ز ابو حسام

kemo0000

07-29-2009, 06:07 PM

حصلت القصة قبل 29عام عند اول ايام زواجي وهي كالتالي
في شهر العسل والدنيا ما هي سايعتني قررنا الذهاب الى احد المناطق وجهزنا امورنا وتوجهت ال المطار برفقة الحبيبة زوجتي وكان الكلام كله عسل بعسل واخر رومانسية ودوبان في الحبيبة المهم رحت الى كاونتر المبيعات وكلمت الزميل لأصدار التزاكر وسمت على باقي الربع ومن ثم رديت الى التذاكر وقلت له ايش تتوقعوا........................................... ....................
خلصتي يا روحي ومن غير شعور الزميل قام يضحك ويضحك وقال لا يا حياتي وانكسفت واحرجت وكانت تعليقة ساخرة علي ال يومكم ذا وكل ما يقابلني يقول لي خلصتي ياروحي .......... هههههههههههههههههههههههههه...ز ابو حسام

kemo0000

07-29-2009, 06:08 PM

حصلت القصة قبل 29عام عند اول ايام زواجي وهي كالتالي
في شهر العسل والدنيا ما هي سايعتني قررنا الذهاب الى احد المناطق وجهزنا امورنا وتوجهت ال المطار برفقة الحبيبة زوجتي وكان الكلام كله عسل بعسل واخر رومانسية ودوبان في الحبيبة المهم رحت الى كاونتر المبيعات وكلمت الزميل لأصدار التزاكرو سلمت على باقي الربع ومن ثم رديت الى التذاكر وقلت له ايش تتوقعوا........................................... ....................
خلصتي يا روحي ومن غير شعور الزميل قام يضحك ويضحك وقال لا يا حياتي وانكسفت واحرجت وكانت تعليقة ساخرة علي الى يومكم ذا وكل ما يقابلني يقول لي خلصتي ياروحي .......... هههههههههههههههههههههههههه...ز ابو حسام